Os traballadores e traballadoras da Vidreira do Atlántico trasladaron o seu agradecemento e satisfacción pola solidariedade amosada polos compañeiros/as das fábricas portuguesas do grupo BA, que están recollendo sinaturas a prol do respecto aos dereitos laborais e o desbloqueo das negociacións. O persoal da Vidreira iniciou este domingo, 29 de marzo, a sétima quenda de folga na fábrica de Xinzo, que volveu rexistrar un seguimento masivo. O Comité tamén remitiu un escrito aos responsábeis da fábrica convocándoos a unha nova xuntanza o vindeiro mércores 1 de abril.

Os traballadores e traballadoras da Vidreira do Atántico de Xinzo manterán unha nova xuntanza o martes 24 de abril, co obxectivo de tentar abrir unha nova vía de diálogo e de solución ao conflito laboral. Sinalan desde o Comité de folga que de non aceitar o acordo de mínimos que exporán os traballadores manteranse as próximas folgas do 29 ao 31 de marzo, ademais doutras mobilizacións e novas medidas xudiciais en materia laboral.

O domingo 15 de marzo retomábanse as xornadas de folga na fábrica da Vidreira do Atlántico, en Xinzo de Limia, que se manterán até o martes 17 de marzo. Os compañeiros e compañeiras desta factoría continúan na acción sindical tentando solucionar este conflito aberto. Asi, o pasado xoves 12 de marzo mantiveron unha reunión con delegados de persoal da CGTP en BA Glass, para coordenar e fixar mobilizacións conxuntas. Despois desta reunión celebraron unha rolda de prensa conxunta, desde a que se emitiu unha moción de solidariedade da CGTP. Tamén teñen previsto convocar mobilizacións para a factoría desta empresa que está situada na provincia de León.

Ás cinco e media da tarde por volta de trescentas persoas se achegaban até o Concello de Xinzo de Limia, onde  daba comezo unha marcha convocada polo Comité de Empresa da Vidreira do Atlántico, e que en poucos minutos xa contaba con case un millar de persoas, que detrás dun grupo de gaiteiros e dunha faixa co lema "A Limia ten futuro", percorrían as rúas desta vila, onde os comercios estaban pechados en solidariedade con estes máis de 120 traballadores e traballadoras. Emoción, berros e moita unidade foi o que se viviu nesta mobilización na defensa dos postos de traballo nesta factoría da Limia, pola solución ao conflito laboral e pola negociación dun convenio colectivo co que non perdan poder adquisitivo.