O Comité de Folga da Vidreira do Atlántico vén de remitir unha oferta de diálogo á dirección da empresa, logo da suspensión da folga, instándoa a convocar nos vindeiros 15 días a Mesa de Negociación, co obxecto de desbloquear o conflito “e vehiculizalo polo vieiro da negociación e o diálogo, tirándoo da canle de confrontación na que se atopa”. Neste senso, ofreceuse á dirección da fábrica a posibilidade de que a xuntanza estea mediada pola Inspección de Traballo.

A asemblea xeral dos traballadores e traballadoras da Vidreira do Atlántico decidiu rexeitar a oferta presentada pola dirección da empresa no transcurso da xuntanza mantida coa representación social, promovida polo Consello Galego de Relacións Laborais, a instou á empresa a continuar o proceso de diálogo, co obxecto de desbloquear a actual situación. O persoal da Vidreira considera que a proposta non achega ningunha novidade a respecto das propostas xa presentadas ou non supón melloras das condicións actuais. Deste xeito, os traballadores e traballadoras da fábrica de A Limia continuarán co conflito colectivo nas tres vías abertas: sindical, xudicial e negociadora.

O venres 26 de xuño daba comezo unha nova xeira de paros na Vidreira do Atlántico a prol do desbloqueo do conflito e para retomar a negociación colectiva. Desta volta, a intensidade das protestas tense incrementado, de xeito que o cadro de persoal secunda un paro continuado de 15 días que afecta a todos os servizos e seccións da factoría de Xinzo. Non obstante, a dirección da Vidreira decretou o que ao entender do Comité e a CIG supón un “peche patronal ilegal”, ao cerrar dúas das tres liñas de produción da fábrica; decisión contra a que xa se teñen presentado denuncias ante a Inspección de Traballo e a Delegación Territorial da Xunta de Galiza en Ourense.  

A Inspección Provincial de Traballo convocou a unha reunión de negociación á dirección da Vidreira do Atlántico e á representación dos traballadores/as para tentar retomar a vía de diálogo que poida propiciar a solución ao conflito. A xuntanza terá lugar o vindeiro venres 26 de xuño, aínda que por parte do Comité e a CIG xa se manifestou que só se suspenderá a convocatoria de folga de 15 días cada xornada que se produza unha negociación e que se retomarán os paros inmediatamente, se se produce un bloqueo ou obstaculización das reunións.

A CIG de Monterrei-A Limia amosou o seu malestar e rexeitamento ao anuncio feito pola Xunta de Galiza, a través dos medios de comunicación, de desmantelar a base de helicópteros de Vilamaior, no distrito forestal de Verín. Dende a Unión Local exixiuse á administración que manteña a base, pois a súa existencia está xustificada pola súa necesidade, e solicitouse aos alcaldes dos Concellos afectados que actúen na defensa dos intereses dos veciños/as desta área.