A CIG de Monterrei-A Limia amosou o seu malestar e rexeitamento ao anuncio feito pola Xunta de Galiza, a través dos medios de comunicación, de desmantelar a base de helicópteros de Vilamaior, no distrito forestal de Verín. Dende a Unión Local exixiuse á administración que manteña a base, pois a súa existencia está xustificada pola súa necesidade, e solicitouse aos alcaldes dos Concellos afectados que actúen na defensa dos intereses dos veciños/as desta área.

O Comité de empresa do persoal laboral do Concello de Xinzo vén de reclamar ao alcalde que proceda a convocar a reunión da Comisión Negociadora, antes do 15 de xullo, co obxecto de avanzar na consecución dun novo convenio colectivo que “normalice as relacións laborais” na institución local. De igual xeito, exixiron ao rexedor que cumpra os acordos establecidos na última reunión da Mesa Xeral a respecto do calendario de reunións e os temas a tratar.

O luns 8 de xuño daba comezou a Folga xeral que, con carácter indefinido, tiñan convocada os/as traballadores/as laborais do Concello de Vilariño do Conso, tentando levar de novo ao Alcalde á Mesa de Negociación “na procura dunha negociación colectiva con respecto á liberdade sindical e sen a ameaza de privatización de servizos coa consecuente perda de postos de traballo”. Non obstante, pouco despois de iniciado o paro os traballadores/as e a central recibían a comunicación de que o rexedor local viña de presentar a súa dimisión á alcaldía.

O vindeiro 10 de xuño terá lugar a xuntanza-mediación solicitada polo Comité de Folga da Vidreira do Atlántico co delegado da Xunta en Ourense, para tentar buscar unha solución ao conflito que se vive na empresa de A Limia dende decembro do ano pasado. Así mesmo, dende a CIG-Verín informaron do sobreseemento e arquivo das denuncias presentadas por un directivo da empresa contra o presidente do Comité e un delegado da CIG e lamentaron a ruptura da unidade de acción na vidreira protagonizada por CCOO.

A CIG de Verín fixo un chamamento a todos os afiliados e afiliadas a participar na concentración convocada o vindeiro martes 2 de xuño, ás 12:00 horas, diante da Subdelegación do Goberno de Ourense. O obxecto da mobilización é amosar a solidariedade cos compañeiros/as que traballan no Concello de Rairiz de Veiga e rexeitar a actitude de “discriminación, intransixencia e desprezo absoluto aos dereitos dos traballadores/as” amosada polo rexedor local.