O Comité de Empresa da Vidreira do Atlántico, S.A., tras a xuntanza mantida coa dirección da empresa o 20 de decembro de máis de 5 horas, convocou unha asemblea de traballadores e traballadoras co obxecto de acordar mobilizacións nos vindeiros días por mor da negativa da empresa á manter o plus de actividade sen suprimir a totalidade das horas extras.

A CIG de Verín vén de denunciar que o actual Convenio Colectivo para o persoal laboral ao servizo do concello de Verín contén erros de grande relevancia entre os que salientan salarios base e complementos diferentes para traballadoras/es de igual grupo e nivel profesional, vulnerando así o principio de igualdade e crebando as normas de clasificación profesional que rexen na administración pública. Por iso a CIG demanda modificacións na RTP e a convocatoria da Mesa Xeral de Negociación, previa aprobación dos orzamentos para o 2009.

Desde a CIG de Ourense están a facer visitas aos centros de traballo pertencentes á Consellaria de Medio Rural desta provincia e, atoparon problemas reais para o desenvolvemento do traballo con seguridade e saúde laboral. Até o de agora, a CIG presentou dúas denuncias ante á Inspección de Traballo, solicitando a paralización inmediata dos traballos nas torretas de vixilancia “Coto de Castro” pertencentes ao Distrito Forestal XII Miño – Arnoia e “Serra de Meda”, do Distrito Forestal XIV Verín – Viana, polo incumprimento grave das medidas de seguridade e do establecido na Lei de Prevención de Riscos Laborais e nos Regulamentos que a desenvolven.

O persoal do concello de Vilariño de Conso vén de convocar unha xornada de folga para este xoves, día 24 de xullo. Demandan do goberno municipal que sente a negociar para facilitar o acordo e asinar un novo convenio colectivo, fixar as bases de contratación do persoal do concello e a Relación de Postos de Traballo. Non é a primeira vez que se mobilizan e, se non hai avances nas negociacións, xa adiantan que tampouco será a última.

A Unión Local de Verín denuncia que o alcalde de Rairiz de Veiga, Xaquín Rodríguez Ambrosio, contratou hai un ano a unha Axencia de Detectives para “controlar, observar, fotografar, gravar e, en definitiva, perseguir e acosar” a un traballador do concello. A actitude deste alcalde contra o traballador xa ten provocado que o concello fora sentenciado a pagar unha indemnización de máis de 13.000 euros por violación da súa integridade moral.