En relación á torreta "Coto de Castro", foron paralizados os traballos pola Inspección unha vez que se fixo a correspondente visita, estando a data de hoxe novamente en funcionamento, despois de realizar os cambios e reformas que garantan a seguridade das persoas que traballan nesta torreta, aínda que faltan melloras doutro tipo por realizar.

Por outra banda, na torreta "Serra de Meda", quedaron pendentes da visita de Inspección ao centro de traballo. A CIG considera que tamén se deberían paralizar os traballos nesta torreta, xa que "representa un risco grave e inminente para a seguridade dos/as traballadores/as, mesmo poñendo en perigo a súa vida".

Críticas ao papel da Administración

Xesús Dorado, delegado sindical e membro do comité de empresa na Delegación Provincial da Consellaria de Medio Rural de Ourense, subliñou que "é lamentábel que a propia administración, que ten que velar polo cumprimento da normativa, mire cara outro lado, mentres os seus traballadores están a prestar servizos nunhas condicións penosas".

Desde a CIG de Ourense anunciaron que "imos continuar coas visitas polos diferentes centros de traballo da Consellaria de Medio Rural, para comprobar o estado no que se encontran e, no caso de que vexamos anomalías que poñan en risco a seguridade dos/as traballadores/as, faremos a correspondente reclamación ante á Inspección de Traballo".