Ás cinco e media da tarde por volta de trescentas persoas se achegaban até o Concello de Xinzo de Limia, onde  daba comezo unha marcha convocada polo Comité de Empresa da Vidreira do Atlántico, e que en poucos minutos xa contaba con case un millar de persoas, que detrás dun grupo de gaiteiros e dunha faixa co lema "A Limia ten futuro", percorrían as rúas desta vila, onde os comercios estaban pechados en solidariedade con estes máis de 120 traballadores e traballadoras. Emoción, berros e moita unidade foi o que se viviu nesta mobilización na defensa dos postos de traballo nesta factoría da Limia, pola solución ao conflito laboral e pola negociación dun convenio colectivo co que non perdan poder adquisitivo.

O Comité da Folga dos traballadores e traballadoras da Vidreira do Atlántico, como resultado da súa acción encamiñada a demostrar a incerteza das razóns aducidas pola Dirección da Empresa para recortar o salario do persoal, obtivo o 23 de febreiro a 2ª e importante resposta dunha Administración Pública, a Consellaría de Industria; que ven avalar as teses dos traballadores/as, no que atinxe a que os custes da produción, na factoría de Xinzo da Limia, poden recurtarse, antes de tocar os salarios, pola vía da negociación e da redución dos custes enerxéticos.

O Comité de Folga dos traballadores e traballadoras da Vidreira do Atlántico, S.A., convocou a diversas organizacións e institucións a unha xuntanza o xoves 19 de febreiro, ás 11:00 horas, no Salón de Plenos do Concello de Xinzo da Limia. O obxectivo da convocatoria é explicarlles a situación na que se atopa o conflito laboral na empresa e, asemade, recoller o seu apoio para a Manifestación Popular convocada en Xinzo o día 27 de Febreiro.

O Comité de folga de Vidreira do Atlántico trasladou un escrito á dirección da empresa comunicando a convocatoria dunha folga xeral en todos os servizos e dependencias a desenvolver durante o mes de febreiro e nos vindeiros meses do 2009 se non se desbloquea o proceso para a negociación do Convenio Colectivo. O persoal da vidreira de Xinzo está secundando nestes momentos un novo paro de 32 horas, o terceiro no que vai de ano.

A CIG de Verín convocou para o venres 6 de febreiro ás cinco da tarde na Praza do Concello de Verín unha mobilización para "reclamar unha negociación xusta" para o persoal laboral e funcionario do concello de Verín. Tamén demandarán nesta mobilización que se respecte "a liberdade sindical daqueles traballadores e traballadoras que non pertencen a opcións sindicais do gusto do alcalde", asi como "a fin das práticas sindicais" que se dan desde a Casa Consistorial.