O sábado 16 de xaneiro tiña lugar o V Congreso da CIG de Ourense, que baixo o lema “Loitar para avanzar” reuniu aos delegados e delegadas escollidas nas distintas federacións para elixir as persoas que comporán os organismos confederais en representación da comarca ourensá. Nesta cita conseguiuse unha candidatura de consenso, que aposta pola unidade e pola renovación, asi como pola necesaria participación de máis mulleres nos organismos.

A CIG, diante das últimas novas aparecidas nos medios de comunicación nos últimos dias sobre o conflito da Vidreira do Atlántico, emitiu un comunicado da prensa no que sinala que "aínda que, aos traballadores e traballadoras da Vidreira do Atlántico, nos tería gustado ollar unha actitude activa dos Alcaldes da Limia en defensa dos postos de traballo, acompañada da presentación dunha protesta perante o Presidente do Grupo BA, polo tratamento discriminatorio e represaliante que se está a infrinxir á nosa comarca e a este País; o certo é que as noticias publicadas, relativas á reunión mantida o 8 de xaneiro na cidade do Porto entre Alcaldes e Presidente do Grupo BA, veñen confirmar e ratificar todo o que, dende Xaneiro do 2009, denunciamos os traballadores e traballadoras da Vidreira e a CIG".

Os traballadores/as da Vidreira do Atlántico solicitaron ao Xulgado de 1ª Instancia de Ourense presentarse como parte no proceso derivado da interposición da demanda concursal por parte da empresa. Así mesmo, reclaman ao xulgado que non admita a solicitude da dirección, pois segundo os datos da memoria do Grupo BA Vidrio (ao que pertence) non existe insolvencia ao terse compensado as perdas da factoría da Limia no seo do ente supraempresarial.

Tal e como reclamaba a CIG e o Comité de Empresa, o Xulgado Social número 1 de Ourense condenou á Vidreira do Atlántico, S.A. a readmitir a dous traballadores que despedira o pasado xullo, ao declarar nulo o despedimento de ambos, por violación do dereito de folga dos mesmos. Ademais, a sentenza condena a empresa a indemnizar a cada un dos operarios con 1.500 euros polo danos morais sufridos e a abonarlle os salarios que deixaron de percibir durante este tempo.