Dous traballadores, subrogados polo Concello de VERÍN da antiga empresa adxudicataria da Depuradora de Augas Municipal, veñen de obter senllas sentenzas favorábeis, polas cales os Xulgados do Social núm. 2 e núm. 1 de Ourense lles recoñecen o dereito a percibir o complemento salarial de antigüidade, computando os anos de servizo prestados para as antigas empresas adxudicatarias.
A Concellaria de Persoal do Concello de Verín suma e segue na súa actuación de aparentar, ficar ben e non gastar nada. Primeiro decide a subrogación dos traballadores, cuestión coa que este sindicato está de acordo, mais, unha vez subrogados, incumpre todas as normas derivadas dos procesos de subrogación:
a) Non negocia as subrogacións coas centrais sindicais do Concello, cuestión que é preceptiva segundo o disposto no artigo 44 do ET.
b) Cría dúas clases de traballadores/as, incompatíbeis co principio de igualdade: os do Concello e os subrogados.
c) Criada a discriminación, impón aos traballadores/as subrogados condicións de traballo inferiores ás que teñen recoñecidas os traballadores/as do Concello para abaratar o seu custe. Por exemplo non lles recoñece, nen a mesma antigüidade nen o mesmo soldo co que contan os traballadores/as municipais no Convenio de Verín.
Pois ben, os Xulgados do Social de Ourense veñen de condenar ao Concello de Verín a pagar a antigüidade aos traballadores/as subrogados, estabelecida nos Convenios Colectivos de orixe, dado que o Concello non negociou coas centrais sindicais do ente local a integración de tais traballadores/as no Convenio do Concello de Verín. É dicer, o tiro pola culata !!! Pretendían privar aos subrogados do complemento de antigüidade previsto no Convenio de Verín non negociando coas centrais sindicais e agora os xulgados condenan, por non negociar, a pagar a antigüidade polos convenios de orixe.
E ista é só a ponta do “iceberg” porque hai mais de 70 traballadores/as subrogados/as nas mesmas condicións dos servizos de axuda no fogar e recollida do lixo.
Alguén niste concello tan progresista debería parar de vender fume e se por a planificar e dignificar as relacións laborais