Resulta que a devandita instalación, que supuxo un desenvolvemento económico importante para a Consellaria de Medio Rural, "non está aproveitada coa suficiencia que se debería, durante a temporada que está en funcionamento só os membros da brigada helitransportada poden empregar a devandita instalación, mentres que os traballadores doutras brigadas teñen que pasar as noites recluídos nunha caseta de dimensións reducidas e sen ningún tipo de servizo, cando as brigadas helitransportadas non están operativas a instalación permanece pechada todo o dia".

"Non estamos a esaxerar"

Desde a CIG de Monterrei - A Limia sinalan que "non estamos a esaxerar o máis mínimo: ao carón dunha instalación recén estreada, con diversidade de servizos, e que permanece pechada, moitos traballadores e traballadoras do SPDCIF só teñen a posibilidade de guarecerse nunha minúscula caseta de madeira, que só é iso, unha sinxela caseta".

Tamén informan desde a CIG que outras instalacións contruídas pola Consellaria de Medio Rural, as de Fumaces e de Nocedo de Val concretamente, non dispoñen dos servizos máis elementais como son a auga e a luz.

Chamamento ás autoridades

A central sindical nacionalista esixe das autoridades da Consellaria de Medio Rural, que "den as ordes oportunas para que todos os traballadores e traballadoras do SPDCIF se poidan beneficiar das instalacións que xa están construídas e debidamente dotadas, ao tempo que reclamamos que se doten dos servizos mínimos aquelas outras que xa están construídas e carecen deles".