Tras máis dun mes de ter solicitado unha entrevista “urxente” co Delegado Territorial da Xunta de Galiza en Ourense, co obxecto de tratar o asunto da paralización unilateral do 33% da actividade da Vidreira do Atlántico, sen autorización administrativa e sen negociación co Comité de Empresa; o máximo responsábel do goberno galego en Ourense “concedeu ao Comité de Empresa a entrevista requirida, para celebrarse o próximo día 15 de setembro, ás 9:00 horas da mañá na sede da Delegación Territorial.

Traballadores e traballadoras portugueses do Grupo BA Glass, propietario de Vidreira do Atlántico S.A, en Xinzo da Limia, veñen de remitir a súa solidariedade coas demandas dos traballadores e traballadoras da planta ourensá, que hoxe comeza a súa primeira xornada de folga para exixir a negociación do convenio colectivo e o cumprimento da lexislación en materia de prevención, entre outras. A convocatoria de folga, que xa fora comunicada á empresa a principios de agosto coincide coa presentación dunha denuncia ante a inspección, polo accidente laboral que acaba de sufrir unha traballadora á que lle saltou un cristal ao ollo provocando lesións de prognóstico grave que afectaron á cornea e o iris.  

O Concello de Verín emitiu, o pasado día 7 de agosto, un Decreto polo que impón á policía local a realización de horas extra (60 ao ano), como se dunha extensión da súa xornada laboral se tratase. Os traballadores da policía local, ademais de continuar coas medidas acordadas en asemblea anunciaron que impugnarán perante o xulgado este novo intento de obrigalos a facer traballos extraordinarios.

A Unión Local da CIG de Verín vén de informar que o TSXG anulou a Sentenza do Xulgado Social nº 1 de Ourense de decembro de 2008, pola que se declarara improcedente o despedimento de CGM (asistente social do Concello de Rairiz da Veiga) e se desestimara a petición de nulidade formulada pola traballadora.