O Comité de Vidreira do Atlántico vén de chamar a unidade dos traballadores e traballadoras logo do fracaso das negociacións na xuntanza mantida coa dirección o 5 de febreiro. A Vidreira rexeitou todas as propostas presentadas polo Comité, que agora anuncia novas xornadas de folga para a fin de semana. "Debemos comunicarvos que non pode haber acordo cunha empresa que o único que procura é suprimir o Plus de Actividade primeiro, logo a prima de responsabilidade, posteriormente a retribución voluntaria e por último conxelar a antigüidade", sinala o Comité de folga.

A segunda convocatoria de folga en Vidreira do Atlántico volveu resultar un éxito total, co 100% do seguimento do persoal, que non se arredou ante as baixas temperaturas e a alerta polo temporal. A segunda xornada de paro comezou o domingo 24 ás 10 da noite e rematará o martes 27 de xaneiro ás 6 da mañá. Ademais, os traballadores e as traballadoras organizaron unha carpa ás portas da fábrica coa colaboración dos/as traballadores/as doutras empresas da zona e mesmo trouxeron un grupo de gaiteiros.

O Tribunal Superior de Xustiza de Galiza vén de declara nulo o segundo despedimento dun traballador, afiliado da CIG, por parte do alcalde do Concello dos Brancos. A sentenza revoga o fallo previo do Xulgado do Social número 3 de Ourense, pola que se tiña cualificado tan só como improcedente o despedimento.

A folga de traballadores da Vidreira do Atlántico daba comezo o domingo 11 de xaneiro ás dez da noite, e resultou un éxito total, pois o seguimento foi unánime no conxunto do persoal, que non tivo que formar parte dos servizos "esenciais, de mantemento e de seguridade" para que o forno desta factoría non parara. Estes servizos, decretados pola empresa, xa están denunciados no xulgado por abusivos, xa que obrigou a 35 traballadores dos 165 a realizar produción nesta noite de folga. "O primeiro toque importante de atención xa está dado", sinala o voceiro da CIG Anxo García, e é que os traballadores en folga cun frio que sinalaba un termómetro co mercurio varios grados baixo cero concentráronse durante toda a noite fronte a empresa contra a perda de dereitos laborais.