A CIG de Ourense vén de presentar unha proposta alternativa co obxectivo de reconducir o plan de axuste económico do Concello de Xinzo de Limia. Os plans municipais contemplan, entre outras medidas, a redución de medio millón de euros en gastos de persoal mediante un ERE extintivo que afectaría a 25 traballadores/as. A central nacionalista, que xa denunciara que o Goberno local pretende aplicarlle os recortes unicamente ao persoal laboral, achega agora unha proposta que permitiría non ter que reducir esta cantidade en gastos de persoal e evitaría os despedimentos, aliviaría a presión fiscal sobre os veciños/as e produciría un superavit de 2 millóns de euros en 10 anos. [CONSULTA O DOCUMENTO AO FINAL DA NOTICIA].

Dous anos despois do peche da empresa ourensá Vidreira do Atlántico por imposición da súa patronal, a Axencia Española de Protección de Datos (AEPD), vén de ditar unha resolución estimando a solicitude de Manoel Anxo García Torres (CIG) e 100 traballadores/as máis. En 2009 solicitáranlle á compañía o acceso e entrega das imaxes e sons gravados pola dirección durante as cinco convocatorias de folga desenvolvidas dende xaneiro a marzo dese ano ao entender que estaba a vulnerar o dereito fundamental como é o de folga.

A Sala do Contencioso Administrativo do Tribunal Superior de Xustiza de Galiza vén de publicar a súa sentenza 43/2012 pola que se condena ao Concello do Carballiño, por violar o dereito á negociación colectiva e á liberdade sindical das centrais sindicais, concretamente, da CIG.

A CIG e o O Concello de Verín alcanzaron un preacordo sobre o inicio da negociación colectiva para o persoal laboral e funcionario que posibilitará, en caso de respectarse, que a representación sindical non impugne, logo de catro anos facéndoo, os orzamentos municipais para o exercicio 2012.

A Sala do Contencioso Administrativo do TSXG, estimando o Recurso de Apelación interposto pola CIG, vén de anular, definitivamente, o Orzamento Xeral do Concello de Verín do ano 2009 por vulnerar o dereito de negociación colectiva da central sindical nacionalista. A sentenza do alto tribunal galego condena tamén á entidade a acometer unha negociación real coa representación sindical. Ademais, o Tribunal Superior de Xustiza de Galiza impón ao Concello, como parte vencida no preito, o pagamento das costas do proceso por valor de 1.000 euros.