O alto Tribunal Galego, dándolle á razón á traballadora, revogou a resolución do xuíz do social nº 1 de Ourense e declarou “nulo radicalmente” o despedimento do que fora obxecto a operaria en xullo do 2008, efectuado, en violación dos seus dereitos fundamentais.

Esta sentenza súmase as múltiples resolucións xudiciais que condenan ao Concello de Rairiz da Veiga, polas accións do seu alcalde, sen que, tras máis de 15 resolucións xudiciais de condena, “ninguén teña tomado cartas no asunto, nin dende o prisma administrativo, nin dende o prisma político. Semella que, neste País, só cando xa non hai remedio, as institucións e os partidos políticos se pronuncian sobre condutas como a que aquí se está a denunciar”, critica o responsábel da Unión Local, Anxo García Torres.

Neste senso, afirma que “non é presentábel” que un alcalde teña recibido máis de 15 condenas e nin os órganos competentes do Estado, nin a súa organización política teña adoptado medidas correctoras. “Esiximos dende a CIG tanto ao Estado, como a organización política que sustenta ao Alcalde que se abra expediente, investigue e, no seu caso, que se depuren as responsabilidades políticas e administrativas que o señor alcalde do Concello de Rairiz ten, ao estar abocando ao seu Concello a unha moi difícil situación económica, patrimonial e institucional”, reclamou García Torres.

Así mesmo, dende a CIG aínda se agarda a querela anunciada polo rexedor local, como resposta á mobilización desenvolvida polo sindicato hai unhas semanas, en protesta pola situación que está a padecer un dos traballadores do Concello.