A CIG OBTÉN A MAIORÍA NAS EE SS DE MCDONALD´S EN OURENSE
As presións e coaccións do empresario non foron quen de dobregar a vontade d@s traballador@s
A CIG vén de obter a maioría da representación sindical na empresa “DAMA OURENSE, S.L.”, franquía ourensá de McDonald's, obtendo dous dos tres representantes a elixir.
Esta vitoria prodúcese a pesar da intromisión ilexítima do administrador único, Esteban Cuesta Martín, que se empregou a fondo presionando, coaccionando, provocando e hostilizando a todo o cadro de persoal, persoa por persoa e de forma colectiva, inmiscuíndose, de forma ilegal, no proceso electoral, conculcando e pisoteando os dereitos fundamentais e a dignidade das persoas. Como consecuencia desta inaceptábel actuación, os servizos xurídicos da CIG están estudando as accións legais a interpoñer, tanto no ámbito laboral coma no penal, por posíbeis delitos contra a liberdade sindical, os dereitos das traballadoras e a dignidade das persoas. A concreción destas actuacións legais darémolas a coñecer na próxima semana.